پاکستانی شہر لاہور میں گزشتہ شام یوم علی کے موقع پر نکالے گئے شیعہ مسلمانوں کے ایک جلوس پر تین خود کش حملوں کے نتیجے میں ہلاکتوں کی تعداد 38 تک پہنچ گئی ہے جبکہ زخمی افراد کی تعداد 200 کے قریب ہے۔ حضرت علی کے یوم شہادت پر نکالے گئے جلوس میں یہ پے در پے حملے اُس وقت کئے گئے، جب یہ ختم ہونے کے قریب تھا۔ اس جلوس میں 35 ہزار کے قریب افراد شامل تھے۔ دھماکوں کے بعد مشتعل افراد نے پولیس اہلکاروں پر حملے کئے اور ایک پولیس اسٹیشن کو بھی آگ لگا دی۔ دوسری طرف امریکہ نے پاکستانی تحریک طالبان تنظیم کو باقاعدہ غیر ملکی دہشت گرد تنظیموں کی فہرست میں شامل کرتے ہوئے اس گروپ پر معاشی اور سفری پابندیاں عائد کردی ہیں۔