امریکی محکمہ خارجہ نے کہا ہے کہ امریکا نے چھ فروری سے دمشق میں اپنے سفارت خانے کے کام معطل کر دیے ہیں۔ سفیر رابرٹ فورڈ اور تمام امریکی اہلکار وہاں سے نکل گئے ہیں۔ امریکی حکام کے مطابق شام میں پرتشدد واقعات میں آنے والی حالیہ تیزی بہت تشویش زدہ کردینے والی ہے کہ ان کے سفارت خانے کو کسی مسلح حملے سے بچاؤ کے لیے کافی سکیورٹی حاصل نہیں ہے۔ اُدھر امریکی صدر باراک اوباما کا کہنا ہے کہ شام کے ساتھ مذاکرات کے ذریعے مسائل کا حل تاحال ممکن ہے۔ انہوں نے یہ بات این بی سی ٹیلی وژن کے ساتھ انٹرویو میں کہی جو پیر کو نشر کیا گیا۔ خیال رہے کہ برطانیہ نے بھی شام سے اپنے سفیر کو واپس بلا لیا ہے۔

فلسطینی صدر محمود عباس اپنی فتح پارٹی اور حریف حماس تحریک کی عبوری اتحادی حکومت میں وزیر اعظم کی حیثیت سے کام کریں گے۔ اس بات کا اعلان ان دونوں گروپوں نے کیا ہے۔ اس حوالے سے فتح پارٹی کے سربراہ محمود عباس اور حماس کے جلا وطن رہنما خالد مشعل نے قطر کے دارالحکومت دوحہ میں معاہدے پر دستخط کیے۔ اتحادی حکومت کے معاہدے کے تحت حماس اور فتح کو عبوری حکومت قائم کرنی ہو گی، جو پارلیمانی اور صدارتی انتخابات کی تیاری کرے گی، جو مئی میں ہوں گے۔ اس معاہدے کے ردِ عمل میں اسرائیلی وزیر اعظم بینجمن نیتن یاہو نے محمود عباس کو خبر دار کیا ہے کہ انہیں اسرائیل یا حماس میں سے کسی ایک کے ساتھ امن کا انتخاب کرنا ہو گا۔

جرمن چانسلر انگیلا میرکل نے یونان پر زور دیا ہے کہ وہ یورپی یونین اور آئی ایم ایف کی جانب سے نئے بیل آؤٹ پیکج کے حصول کی سخت شرائط قبول کرنے پر جلد تیار ہو جائے۔ تاہم یونان کے سیاسی رہنماؤں نے اس حوالے سے اپنا فیصلہ مزید ایک دِن کے لیے مؤخر کر دیا ہے۔ یونانی رہنماؤں نے یورپی یونین اور آئی ایم ایف کے اہلکاروں کے ساتھ پیر کو بھی مذاکرات کیے، تاہم اتوار کی طرح یہ بات چیت بھی بے نتیجہ ہی رہی ہے۔ اس حوالے سے پیرس میں فرانس کے صدر نکولا سارکوزی کے ساتھ مشترکہ نیوز کانفرنس سے خطاب میں انگیلا میرکل نے کہا کہ یونان کو اس حوالے سے فیصلے کے لیے اور کتنے دِن درکار ہے، وہ یہ بات سمجھنے سے قاصر ہوں۔

یونان کی مخلوط حکومت سرکاری ملازمتوں میں کمی پر متفق ہو گئی ہے۔ اس حوالے سے رواں برس پندرہ ہزار ملازمتیں ختم کرنے کا فیصلہ کیا گیا ہے۔ وہاں  سرکاری ملازمین کی تعداد تقریباﹰ سات لاکھ پچاس ہزار ہے اور 2015ء تک ان میں سے ڈیڑھ لاکھ کو نہ صرف فارغ کر دیا جائے گا، بلکہ ان کی پوزیشنیں بھی ختم کر دی جائیں گی۔ پبلک سیکٹر میں اصلاحات کے وزیر ڈیمتریس ریپاس کا کہنا ہے کہ ملازمتوں میں کمی ملک کے انتظامی ڈھانچے کی تشکیل نو کا حصہ ہے۔

رومانیہ کے وزیر اعظم امیل بوک کے مستعفی ہونے کے بعد انٹیلیجنس سروس کے سربراہ ميهائی رازفان اونگورينو کو نئی حکومت کی تشکیل کے لیے نامزد کیا گیا ہے۔  بوک اپنی کابینہ کی بچتی پالیسی کے خلاف اپنی ہی جماعت کے جانب سے احتجاج پر مسعتفی ہو گئے، جس کے بعد صدر ترايان باسيسكو نے اونگورینو کو وزیر اعظم نامزد کیا ہے۔  اونگورینو 2004ء سے 2007ء تک رومانیہ کے وزیر خارجہ بھی رہ چکے ہیں۔

امریکی محکمہ انصاف کا کہنا ہے کہ پاکستانی نژاد امریکی ٹیکسی ڈرائیور راجہ لہراسب خان نے دہشت گردوں کو رقوم فراہم کرنے کے منصوبے سے متعلق الزامات کا اعتراف کر لیا ہے۔ حکام کا کہنا ہے کہ لہراسب خان نے غیرملکی دہشت گرد گروہ کو مادی مدد فراہم کرنے کا الزام قبول کیا ہے۔ اسے مارچ 2010ء میں گرفتار کیا گیا تھا۔ امریکی حکام نے کہا ہے کہ وہ امریکہ کے لیے کبھی بھی فوری خطرہ نہیں بنا تھا اور اس نے دہشت گردوں کے ایک مبینہ رہنما کو ذاتی طور پر چند سو ڈالر بھیجے تھے۔

انڈونیشیا نے جوہری تجربے پر پابندی کے معاہدے سی ٹی بی ٹی کی توثیق کر دی ہے۔ یوں وہ اس معاہدے پر دستخط کرنے والا 157واں ملک بن گیا ہے۔ تاہم چوالیس جوہری ملکوں کے گروپ میں شامل آٹھ ریاستوں نے ابھی تک اس معاہدے کی توثیق نہیں کی ہے، جن میں چین، مصر، بھارت، ایران، اسرائیل، پاکستان، روس اور امریکہ شامل ہیں۔  انڈونیشیا کے وزیر خارجہ مارتى ناتاليجاوا نے ان ملکوں پر زور دیا ہے کہ وہ جرأت کا مظاہرہ کرتے ہوئے اس معاہدے کی توثیق کر دیں۔

پاکستان نے دبئی کے آخری ٹیسٹ میں انگلینڈ کے خلاف تاریخ ساز کامیابی حاصل کر لی ہے۔ پاکستانی ٹیم پہلی اننگز میں صرف 99 رنز بنا سکی تھی اس طرح گز شتہ 104 سالوں میں وہ سو رنز سے کم پر آؤٹ ہو کر ٹیسٹ میچ جیتنے والی دنیا کی پہلی ٹیم بن گئی۔ یہ پاکستان اور انگلینڈ کے درمیان گز شتہ اٹھاون سال میں باہمی ٹیسٹ میچوں میں پہلا موقع تھا جب کسی ٹیم نے سیریز کے تمام میچوں میں کامیابی حاصل کی اور کلین سویپ کیا۔ پاکستانی آف اسپنر سعید اجمل کو مین آف دی سیریز اور ٹاپ آرڈر بیٹسمین اظہر علی کو اپنے کیریئر کی بہترین 157 رنز کی اننگز کھیلنے پر مین آف دی میچ قرار دیا گیا۔ اب دونوں ٹیمیں چار ایک روزہ اور تین ٹی ٹوئنٹی میچوں کی سیریز کھیلیں گی۔ پہلا ایک روزہ میچ تیرہ فروری کو ابو ظہبی میں کھیلا جائے گا۔